मुंबई प्रतिनिधी : ‘होणार सून मी या घरची’ मालिकेतून घराघरात पोहचलेली अभिनेत्री म्हणजे तेजश्री प्रधान. तेजश्री पुन्हा एकदा प्रेक्षकांच्या भेटीस येणार आहे. ‘झी मराठी’वरील आगामी ‘अग्गंबाई सासूबाई’ या मालिकेतून तेजश्री छोट्या पडद्यावर पुन्हा दिसणार आहे. विशेष म्हणजे तिच्यासोबत या मालिकेत लोकप्रिय अभिनेत्री निवेदिता सराफही झळकणार आहेत. या मालिकेचा प्रोमो नुकताच प्रेक्षकांच्या भेटीस आला असून यामध्ये तेजश्रीच्या सासूबाई म्हणजेच निवेदीता यांचे लग्न होत असतानाचे दृश्य दाखवण्यात आले आहे. यामुळे या मालिकेबद्दल प्रेक्षकांची उत्सुकता ताणली गेली आहे.
‘होणार सून मी या घरची’ या मालिकेतून तेजश्री ही महाराष्ट्रातील घराघरात पोहोचली. इतकंच नव्हे तर ती महाराष्ट्राची लाडकी व आदर्श सून बनली. त्यानंतर तेजश्रीने चित्रपटात आणि नाटकात काम केलं. त्यामुळे छोट्या पडद्याला काही काळासाठी तिने रामराम ठोकला. पण आता तेजश्री पुन्हा एकदा छोट्या पडद्याकडे वळणार आहे.
‘अग्गंबाई सासूबाई’ या आगामी मालिकेत तेजश्री प्रमुख भूमिकेत दिसणार आहे. तेजश्री सोबतच या मालिकेत निवेदिता सराफ, रवी पटवर्धन आणि गिरीश ओक हे प्रमुख भूमिकेत दिसणार आहेत. दिग्गज कलाकारांचा मेळ असलेली ही मालिका नक्कीच रंजक असेल यात शंकाच नाही. हि मालिका २२ जुलै पासून रात्री ८.३० वाजता प्रेक्षकांच्या भेटीला येणार आहे याचाच अर्थ ‘तुला पाहते रे’ ही मालिका प्रेक्षकांचा निरोप घेणार आहे.
तेजश्री ची नवी मालिका ‘अग्गंबाई सासूबाई’ लवकरच प्रेक्षकांच्या भेटीला
